Մակամորձու քրոնիկ բորբոքում (քրոնիկ էպիդիդիմիտ)

Եթե մակամորձու բորոբքումը տևում է 3 ամսից ավելի, ապա կոչվում է քրոնիկ էպիդիդիմիտ:

Պարզվել է, որ ուրոլոգիական կլինիկա դիմած հիվանդների 0.9% - ի մոտ հայտնաբերվում է մակամորձու քրոնիկ բորբոքում:

Քրոնիկ էպիդիդիմիտը պայմանականորեն բաժանվել է երեք ենթատեսակի՝

Մակամորձու քրոնիկ ինֆեկցիոն բորբոքում:

Մակամորձու քրոնիկ պոստօբստրուկցիոն բորբոքում:

Մակամորձու քրոնիկական ցավ:

Մակամորձու քրոնիկ ինֆեկցիոն բորբոքումը հետևանք է մակամորձու սուր բորբոքման, որը ոչ լիարժեք բուժման պարագայում վեր է ածվում քրոնիկի:

Մակամորձու քրոնիկ օբստրուկցիոն բորբոքումը պայմանավորված է սերմնալարի խցանումով, որը կարող է լինել բորբոքման հետևանքով կամ վիրահատական միջամտության հետևանքով (Օր. Վազոտոմիայից հետո):

Մակամորձու քրոնիկական ցավ ենթատեսակը կիրառվում է բոլոր այն դեպքերում, երբ պատճառը հնարավոր չի լինում հայտնաբերել: 

Ինչպե՞ս է ախտորոշվում մակամորձու քրոնիկ բորբոքումը:

Մակամորձու քրոնիկ բորբոքման ախտորոշման ժամանակ պետք է հաշվի առնել բոլոր այն գործոնները, որոնք կարող են բերել մակամորձու սուր բորբոքման:

Շոշափման ժամանակ մակամորձին քիչ մեծացած, պնդացած, ցավոտ:

Հիվանդի նյարդաբանական վիճակի գնահատում:

Լաբորատոր հետազոտություններից անհրաժեշտ է կատարել

Մեզի ընդհանուր հետազոտություն:

Մեզի բակտերիոլոգիական հետազոտություն:

Սեռավարակների կասկածի դեպքում համապատասխան հետազոտություններ:

Գերձայնային հետազոտություն: 

Ինչպե՞ս է բուժվում մակամորձու քրոնիկ բորբոքումը:

Մակամորձու խրոնիկ բորբոքման ժամանակ նշանակվում է հակաբակտերիալ, հակաբորբոքիչ բուժում: Որոշ դեպքերում հնարավոր է կարիք լինի տագնապամարիչ դեղորայքի նշանակման:

Եթե հայտնաբերվել է սեռավարակ, ապա նշանակվում է համապատասխան բուժում:

Մակամորձու քրոնիկ բորբոքման ժամանակ նաև կատարվում է նեյրոստիմուլյացիա, որը որոշ հիվանդների մոտ կարող է բերել բավարար արդյունքի:

Կիրառվում է նաև բուժում բոտուլինոտոքսինի ներարկման եղանակով:

Բավականին արդյունավետություն ունի նաև սերմնալարի ներվի բլոկադան:

Եթե մակամորձու քրոնիկ բորբոքման վերոնշյալ բուժումները կամ միջամտությունները բավարար արդյունք չեն տալիս ապա կատարվում է մակամորձու հեռացման վիրահատություն: