Շագանակագեղձի ՏՈւՌ

Շագանակագեղձի տրանսուրետրալ ռեզեկցիան – ՏՈՒՌ կամ միջմիզուկային մասնահատումը ուրոլոգիական պրակտիկայում ամենահաճախ կատարվող վիրահատություններից է: Շագանակագեղձի ՏՈւՌ – ը կատարվում է շագանակագեղձի գերաճի հետևանքով առաջացած միզարձակման խանգարումները վերացնելու նպատակով:

Ո՞ր գանգատների դեպքում է հնարավոր շագանակագեղձի ՏՈւՌ  վիրահատության կարիք:

Շագանակագեղձի գերաճի՝ առավել հաճախ ադենոմայի (շագանակագեղձի բարորակ գերաճ) դեպքում կարող են դիտվել մի շարք գանգատներ, որոնք որոշ դեպքերում կարող են պահպանվել նաև դեղորայքային բուժումից հետո:

Որո՞նք են վերոնշյալ գանգատները՝

- Հաճախամիզություն:

- Միզելու անզուսպ ցանկություն:

- Թուլացած շիթով միզարձակում:

- Միզարձակման տևողության երկարացում:

- Գիշերային հաճախամիզություն:

- Ընդհատվող միզարձակություն:

- Միզելուց հետո միզապարկի ոչ լրիվ դատարկման զգազողություն:

Եթե վերոնշյալ գանգատների ժամանակ դեղորայքային բուժումը չի դալիս բավարար արդյունք, ապա հնարավոր է կարիք լինի կատարելու շագանակագեղձի ՏՈւՌ վիրահատություն:

Որո՞նք են շագանակագեղձի ՏՈՒՌ վիրահատության կատարման բժշկական ցուցումները:

Շագանակագեղձի ադենոմայի դեղորայքային բուժման անարդյունավետության դեպքում առաջարկվում է կատարելու շագանակագեղձի ՏՈւՌ, եթե բուժառուի մոտ հայտնաբերվել է՝

- Սուր միզակապություն:

- Քրոնիկական միզակապություն:

- Միզապարկի դիվերտիկուլ:

- Միզապարկի քար:

- Կրկնվող արյունամիզություն:

- Երիկամային անբավարարություն:

- Շագանակագեղձի քրոնիկ բորբոքում (քրոնիկական պրոստատիտ), որը չի անցնում դեղորայքային բուժման արդյունքում:

Ի՞նչ հետազոտություններ են անհրաժեշտ շագանակագեղձի ՏՈՒՌ վիրահատությունից առաջ:

Շագանակագեղձի ՏՈՒՌ վիրահատությունից առաջ կարիք է լինում կատարելու՝

- Արյան և մեզի լաբորատոր հետազոտություններ:

- Որովայնի գերձայնային հետազոտթյուն:

- Ուրոֆլոումետրիա:

- ԷՍԳ – սրտաբանի խորհրդատվություն:

- Կրծքավանդակի ռենտգեն:

- Հարակից հիվանդությունների դեպքում համապատասխան մասնագետի խորհրդատվություն:

Բուժառուի նախավիրահատական բավարար հետազոտումը նվազեցնում է շուրջվիրահատական բարդությունների վտանգը:

Ինչպե՞ս է կատարվում շագանակագեղձի ՏՈՒՌ վիրահատությունը:

Շագանակագեղձի ՏՈՒՌ – ը էնդոսկոպիկ վիրահատություն է, որը մեծամասմաբ կատարվում է ողնուղեղային անզգայացման ներքո, սակայն որոշ դեպքերում նաև կատարվում է ընդհանուր անզգայացում:

Սկզբից կատարվում է ցիստոսկոպիա, միզուկի շագանակագեղձի և միզապարկի վիճակը գնահատելու նպատակով: Այնուհետև ռեզեկտոսկոպ գործիքի օգնությամբ կատարվում է շագանակագեղձի գերաճի մասնահատում և կտորների հեռացում: Շագանակագեղձի ՏՈՒՌ – ի վերջում կատարվում է վերքային մակերեսի հետևողական կոագուլյացիա հետագա արյունահոսությունները կանխելու նպատակով:

Շագանակագեղձի ՏՈՒՌ – ը ավարտելուց հետո դրվում է միզային կատետեր միզապարկի կաթիլային լվացումների նպատակով:

Ուրետերալ կատետերը մեծամասամբ հեռացվում է հետվիրահատական երկրորդ օրը և միզարձակումը ստուգելուց հետո բուժառուն դուրս է գրվում կլինիկայից:

Ի՞նչ խնդիրներ կարող են դիտվել շագանակագեղձի ՏՈՒՌ վիրահատությունից հետո:

Շագանակագեղձի ՏՈՒՌ – ից հետո կարող են դիտվել՝

- Հաճախամիզություն:

- Միզելու անզուսպ ցանկություն:

- Երբեմն արյունամիզություն:

- Հաճախ հետադարձ սերմնաժայթքում:

- Հազվադեպ անմիզապահություն:

Ի՞նչ խորհուրդներ են տրվում շագանակագեղձի ՏՈՒՌ վիրահատությունից հետո:

Քանի որ միզուղիների վերքերի լավացումը սովորաբար տևում է 28 օր, ապա շագանակագեղձի ՏՈՒՌ վիրահատությունից հետո մոտական 1 ամսվա ընթացքում նշանակվում են որոշակի դեղամիջոցներ: Բացի այդ խորհուրդ է տրվում ընդունել մեծ քանակությամբ հեղուկներ՝ մեզը նոսրացնելու և գանգատներից խուսափելու նպատակով: Շագանակագեղձի ՏՈՒՌ – ից հետո անհրաժեշտ է նաև հետևել սննդակարգիկ փորկապությունից խուսափելու նպատակով: Խուսափել սուր շնչական վիրուսային հիվանդություններով հիվանդների շփումից, հետագայում հազ և արյունամիզություն չունենալու համար: Մոտակա 1  ամսում արգելվում է ալկոհոլի օգտագործումը:

Շագանակագեղձի ՏՈՒՌ – ից 1 ամիս անց նշանակվում է կրկնակի այց, միզարձակման վերջնական գնահատման նպատակով, որի համար կատավում է ուրոֆլոումետրիա: