07-31-2022
Պերկուտան նեֆրոստոմիան վիրահատական միջամտություն է, որի ժամանակ մաշկի միջով դեպի երիկամի ավազան անց է կացվում խողովակ՝ երիկամից մեզի արտահոսքը ապահովելու նպատակով:
Պերկուտան նեֆրոստոմիան հնարավորություն է տալիս երիկամի նորմալ գործունեության, կանխում է երիկամի հետագա վնասումը և բորբոքային պրոցեսի առկայության դեպքում նպաստում է վերջինիս վերացմանը:
Որ դեպքերում է կատարվում պերկուտան նեֆրոստոմիա ?
Պերկուտան նեֆրոստոմիան հիմնականում կատարվում է հիդրոնեֆրոզի (երիկամի բաժակ-ավազանային համակարգի լայնացման) ժամանակ, որի պատճառները բազմազան են՝
- Երիկամի քար, որը խցանում է երիկամից մեզի հոսքը դեպի միզածորան:
- Միզածորանի վնասում:
- Միզածորանի նեղացում:
- Հետորովայնամզային տարածության ֆիբրոզ (Օրմոնդի հիվանդություն):
- Ուռուցքային հիվանդություններ, որոնք բերում են միզածորանի խցանման:
- Երիկամի կամ միզածորանի ֆունկցիայի գնահատման նպատակով:
Ինչպես է կատարվում պերկուտան նեֆրոստոմիան ?
Պերկուտան նեֆրոստոմիան կարելի է կատարել և տեղային և ընդհանուր անզգայացման ներքո, սակայն եթե հիվանդի առողջական վիճակը թույլ է տալիս, ցանկալի է կատարել ընդհանուր անզգայացման ներքո, քանի որ այդ դեպքում հիվանդի շնչառությունը կառավարելի է, որը հեշտացնում է խողովակի տեղադրման գործընթացը և նվազեցնում է երիկամի վնասման հավանականությունը: Պերկուտան նեֆրոստոմիան կատարվում է ռենտգեն և ուլտրաձայնային հսկողության ներքո: Սկզբում մաշկի վրա կատարվում է փոքրիկ կտրվածք, որի միջով դեպի երիկամի ավազան անց է կացվում պունկցիոն ասեղ: Ասեղի միջոցով երիկամի ավազան լցվում է կոնտրաստ նյութ, և ռենտգեն հետազոտությամբ նկարվում է երիկամի բաժակ-ավազանային համակարգը: Այնուհետև ասեղի միջով անց է կացվում ուղեկցորդ, ասեղը հեռացվում է, և ուղեկցորդի վրայով երիկամի ավազան է անց կացվում խողովակը: Վերջինս իր թելով ֆիքսվում է, և մաշկին լրացուցիչ ֆիքսվում է կարով: Դրվում է ստերիլ վիրակապ: Խողովակին միացվում է միզատոպրակը, որի մեջ լցվելու է երիկամից դուրս եկող մեզը:
Վիրահատությունը միջինը տևում է 20 րոպե:
Ինչ բարդություններ կարող են դիտվել պերկուտան նեֆրոստոմիայի ժամանակ ?
- Արյունահոսություն
- Հարակից օրգանների վնասում:
- Կոնտրաստ նյութից ալլերգիկ ռեակցիա:
Այս միջամտության ժամանակ բարդություններ քիչ են հանդիպում:
Պերկուտան նեֆրոստոմիայի հետվիրահատական շրջանը
Պերկուտան նեֆրոստոմիայից հետո հիվանդը դուրս է գրվում հիվանդանոցից մեկ կամ մի քանի օր անց՝ ընդհանուր վիճակից կախված:
Դուրս գրվելուց հետո հիվանդին նշանակվում է դեղորայք, բացատրվում է ինչպես կատարել խողովակի խնամք, միզատոպրակի մեզը հաճախակի դատարկել, սահմանափակել ֆիզիկական ակտիվությունը:
Նեֆրոստոմային խողովակը հեռացվում է խնդիրների վերացումից հետո:
