Սեռական գորտնուկներ (Կոնդիլոմաներ)

Ի՞նչ են սեռական գորտնուկները (կոնդիլոմաները):

Սեռական կոնդիլոմաները բարորակ մաշկային գոյացություններ են, որոնք կարող են ունենալ հարթ, հանգուցանման կամ ոտիկայի գոյացության տեսք: Սովորաբար լինում են 1-5մմ չափերի, սակայն բարդացած դեպքերում կարող են հանդիպել նաև կոնդիլոմաների միաձուլման ավելի մեծ չափերի օջախներ: Գունային երանգը սովորաբար մոտ է լինում մաշկի գույնին, սակայն հանդիպում են նաև ավելի մուգ գույնի ախտահարումներ: 

Օրգանիզմում որտե՞ղ կարող են առաջանալ սեռական կոնդիլոմաներ:

Կոնդիլոմաները կարող են ախտահարել սեռական օրգանների մաշկը, լորձաթաղանթները, շեքի շրջանը, հետանցքի շրջանը, աճուկային կամ ցայլային շրջանները: 

Որ հարուցիչներն են կոնդիլոմաների առաջացման պատճառը ?

Ավելին քան 95% դեպքերում կոնդիլոմաները առաջանում են Մարդու Պապիլոմավիրուսի HPV 6 և 11 ենթատեսակները, սակայն հետազոտության ժամանակ զուգահեռ կարող են հայտնաբերվել նաև քաղցկեղ առաջացնող HPV 16 և 18 տարատեսակները: 

Վարակումից որքա՞ն ժամանակ անց կարող են հայտնաբերվել կոնդիլոմաներ:

Վարակի փոխանցումը կատարվում է գերազանցապես սեռական ճանապարհով: Վարակումից մինչև կոնդիլոմաների առաջացումը կանաց մոտ միջինը տևում է 2.9 ամիս իսկ տղամարդկանց մոտ միջինը 11 ամիս: 

Ի՞նչ գանգատներ են դիտվում կոնդիլոմաների ժամանակ:

Մեծավասամբ հիվանդները նշում են միայն կոնդիլոմաների առկայությունը, սակայն որոշ դեպքերում կարող է դիտվել քոր, արյունային արտադրություն, դիսպարունիա (ցավ սեռական հարաբերության ընթացքում):

Կոնդիլոմաները կարող են նաև բացասաբար ազդել հիվանդի հոգեբանական վիճակի վրա առաջացնելով ջղայինություն, տագնապի և ինքնագնահատականի նվազեցման: 

Ինչպե՞ս տարբերակել կոնդիլոման մաշկի նախաքաղցկեղային կամ չարորակ նորագոյացությունից:

Եթե գոյացությունը արյունահոսում է, մակերեսը խոցոտված է կամ հարակից մաշկը շոշափման ժամանակ պնդացած է, ապա պետք է կասկածել գոյացության վատ բնույթի վերաբերյալ: Նման դեպքում անհրաժեշտ է անհապաղ կատարել բիոպսիա, գոյացության բնույթը պարզելու համար: 

Սեռական կոնդիլոմաների ի՞նչ բուժման եղանակներ կան:

Բուժումը կատարվում է ինչպես լոկալ դեղորայքների կիրառումով, այնպես էլ վիրահատական միջամտության միջոցով:

Ըստ կատարված հետազոտությունների կոնդիլոմաների բուժման վիրահատական եղանակը առավել արդյունավետ է և ապահովում է կոնդիլոմաների վերացում մինչև 100%-ով:

Վիրահատական միջամտություններից ամենաարդյունավետը լազերային եղանակով հեռացումն է, որի դեպքում կրկնման հավանականությունը ամենացածրն է: