04-16-2022
Ի՞նչ է միզուկի կարունկուլը:
Միզուկի կարունկուլը բարորակ նորագոյացություն է, որը գերազանցապես հանդիպում է կանանց մոտ մենոպաուզայից հետո: Ավելի վաղ տարիքում գրանցվել են հազվադեպ դեպքեր: Այն մեծամասամբ հայտնաբերվում է միզուկի արտաքին հատվածի հետին պատին:
Միզուկի պոլիպը նույնպես բորորակ գոյացություն է, որը ավելի շատ հանդիպում է վաղ մանկական հասակում աղջիկների մոտ:
Ի՞նչ ախտանշաններ են դիտվում միզուկի կարունկուլի ժամանակ:
Այն հաճախ կարող է ընթանալ առանց որևէ ախտանշանների, սակայն կարող են դիտվել նաև
- Արյունահոսություն
- Ցավ
- Կեղծ միզելու ցանկություն
- Գերզգայունություն
- Միզարձակման խանգարումներ
Ի՞նչ հիվանդություններից պետք է տարբերակել միզուկի կարունկուլը:
- Ուրետրոցելե
- Հարմիզուկային գեղձի թարախակույտ
- Կոնդիլոմա
- Սկենեի գեղձի կիստա
- Միզուկի մելանոմա
- Տուբերկուլյոզ
- Լիմֆոմա
- Միզուկի լեյոմիոմա
- Միզուկի կարցինոմա
Որո՞նք են միզուկի կարունկուլի առաջացման պատճառները:
Մի շարք տեսություններ են փորձել բացատրել միզուկի կարունկուլի առաջացման մեխանիզմները՝
- Ինֆեկցիոն և խրոնիկ բորբոքային պրոցեսսները:
- Սկենեի ծորանի կիստայի պատռումը:
- Պոստմենոպաուզալ շրջանում էստրոգենների (կանանց հորմոն) մակարդակի նվազումը:
- Միզուկի արտանկման հատվածի գերգրգռվածությունը և բորբոքումը:
Որո՞նք են միզուկի կարունկուլի բուժման եղանակները:
- Դեղորայքային
- Վիրահատական
Դեղորայքային բուժումը իր մեջ ներառում է հակաբորբոքիչ, հակաբակտերիալ բուժում, տեղային հորմոնալ քսուկների օգտագործում, սակայն այս եղանակների արդյունավետությունը ցածր է:
Վիրահատական եղանակը ավելի նախընտրելի է, քանի որ այս դեպքում խնդիրը ստանում է արմատական լուծում:
Եթե հիվանդի մոտ դիտվում է նաև արյունային արտադրություն կամ արյունամիզություն, ապա անհրաժեշտ է կատարել նաև ուրետերոցիստոսկոպիա՝ բորբոքյին կամ քաղցկեղային բնույթը բացառելու համար:
Ինչպե՞ս է կատարվում վիրահատությունը:
Վիրահատությունից առաջ տեղադրվում է միզային կատետեր, որը հեռացվում է մեկ օր անց:
Վիրահատությունը կատարվում է տեղային անզգայացման տակ: Այն տևում է 10 րոպե: Կառունկուլը հատելուց և հեռացնելուց հետո միզուկը կարվում է ներծծվող թելերով:
Վիրահատությունից 30 րոպե անց հիվանդը կարող է գնալ տուն:
Վիարահտության առավելությունը նաև այն է, որ հեռացված հյուսվածքը ուղարկվում է հյուսվածքաբանական հետազոտության՝ ախտորոշման ճշգրտման նպատակով:
