Ամորձու պրոթեզ (տեղադրում)

Ի՞նչ է ամորձու պրոթեզը:

Առկա են ամորձու պրոթեզների տարբեր տեսակներ(ապակի, պոլիէթիլեն, դակրոն, գելային և հեղուկ պարունակությամբ), սակայն առավել հաճախ կիրառվում են սիլիկոնային պրոթեզները: 

Ե՞րբ է կատարվում ամորձու պրոթեզի տեղադրում:

Ամորձու պրոթեզի տեղադրումը կոսմետիկ վիրահատություն է, և ամորձու պրոթեզը ամորձուն փոխարինում է միայն կոսմետիկ առումով: Այն չի կատարում ամորձու ֆունկցիաները՝ տղամարդկային հորմոնի (Տեստոստերոնի արտադրություն) կամ սպերմատոզոիդների (սերմնաբջիջներ) արտադրություն:

Այս վիրահատությունը կարիք է լինում կատարելու մի շարք դեպքերում՝

-   Ամորձու կամ ամորձիների բնածին բացակայություն

-   Ամորձու իջեցման գործընթացի խանգարման (կրիպտօրխիզմ), որոշ դեպքերում

-   Ամորձիների ատրոֆիա ինչ-որ հիվանդության պատճառով

-   Ամորձու տրավմատիկ ջնջխում

-   Ամորձու վիրահատական հեռացում տարբեր պատճառներից, Օր շագանակագեղձի քաղցկեղի ժամանակ ամորձիների հեռացում: 

Որո՞նք են վիրահատության կատարման հակացուցումները:

-   Հոգեկան խանգարումներ

-   Օրգանիզմի սուր բորբոքային հիվանդություններ

-   Քրոնիկ բորբոքային հիվանդություններ սրացման փուլում

-   Փոշտի շրջանի բորբոքային պրոցեսսներ

-   Շաքարային դիաբեթ դեկոմպենսացված շրջանում 

Ի՞նչ է կատարվում նախավիրահատական շրջանում:

Նախավիրահատական շրջանում հիվանդի ընդհանուր առողջական վիճակի գնահատումից բացի շատ կարևոր հարց է նաև ամորձու պրոթեզի տեսակի և չափերի որոշումը: Որակական առումով ամորձու պրոթեզներից առավել լավը սիլիկոնային պրոթեզն է: 

Ինչպե՞ս է որոշվում տեղադրվող ամորձու պրոթեզի չափսը:

Եթե մեկ ամորձին առկա է, ապա կատարվում է գերձայնային հետազոտություն և կատարվում է ամորձու չափումներ: Պրոթեզի չափը ընտրվում է եղած ամորձու չափին համապատասխան:

Եթե երկու ամորձիները բացակայում են, ապա կատարվում է փոշտի մաշկի չափումներ հանգստի և ձգված վիճակում, որպեսզի պրոթեզները հնարավոր լինի տեղադրել փոշտում: 

Վիրահատությունը ունի էսթետիկ նշանակություն և դրական ազդեցություն է թողնում պացիենտի հոգեբանական վիճակի վրա, քանի որ արտաքինից վիզուալ և շոշափման միջոցով հնարավոր չէ տարբերակել իրական ամորձուց: